Fe

Claramente, aki na Aruba nos ta bibando den un mundo di fantasia. Anto hopi di nos riba dje tin nan propio version di e mundo ey.

Trahadornan di Elmar, WEB y awemainta Arubus ainda ta kere cu nan por y mester haya nan 12,5 porciento bek. Hecho ta berdad cu no tur parti di sector publico ta pitch in. Gobierno di berdad a lepia eynan y ni cuanto Tanchi taha awo pa Banco Central, Apfa y FCCA tambe entrega, e daño na e confiansa y e solidaridad a wordo haci caba. Pero esaki no ta e momento pa exigi. Sigur no awor cu e resto di nos economia ta den cuminsa collapse.

Den proximo lunanan mas y mas negoshi ta bay sera y mas y mas hende ta bay haya nan mes sin trabou y batiendo na porta di FPNC, Cruz Cora y oficina di FASE. No solamente e no ta factibel - pio si bo tene cuenta cu e posicion di Hulanda cu na dado momento e financiamento ta bay stop -, e por trese tension mas laat ora pobresa y desesperacion kick in den serio y problemanan ta cuminsa surgi den bario, entre bisiñanan.

Ami no ta get con nan no ta wak, of si nan no kier wak, of si kizas tin politica hungando un rol, pero at this point hende mester cuminsa lanta for di nan soño y realisa cu pa cuminsa nan tin suerte cu nan tin trabou ainda, y cu e cortamento di salario ta bay dura at least un paar di aña mas. Apesar cu tin vacuna na caminda, nos ta hopi - HOPI - leu for di cas ainda. Turismo no ta bay kickstart bek asina lihe, mirando con na Merca, Latino-America y Europa nan ta leu di tin e pandemia bou control. Fuera di esey, nos no tin niun otro carta pa hunga. Letterlijk niun. Den sector priva trahadornan a acepta cu e salario cu nan tabatin pre-Covid ta algo di pasado. Somehow, cierto trahadornan den sector (semi-) publico ainda ta kere cu nan ta traha di un tipo di tela special y cu nan si por keda claim pa bay bek den tempo y haci comosifuera cu Covid no ta toca nan. By the way, tuma nota si cu mi no a menciona enfermeronan. Los di e presion den cual nan ta traha dia aden dia afo y cu lo por bira mas si e variante Ingles di Covid plama y mas hende bira malo, nan tin cu wak con nan sector ta wordo corta structuralmente cu 5 miyon cada luna. Y nan no tin e salarionan halto cu hopi trahador por ehempel na Elmar si tin. Pero hasta nan na dado momento lo mester realisa cu no por bay bek. Niun di nos, sea den sector publico, semi-publico, politico, priva, clase abou, clase media, ni hasta esnan cu placa por bay bek. At least pa un paar di aña.

Nos tur ta buskando un edge, un manera pa sobrevivi y logra bay dilanti toch. Nos ta asina custumbra di ta individualista, di cuida pa nos mes y nos mesun famia y biba segun e motto di ‘laga pa ken’. Esaki no ta e momento mas pa esey. E mentalidad ey mester laga pa pasado pasobra den futuro e ta bay costabo mas cu bo lo kier imagina. Si nos kier of no, si nos gusta otro of no...nos tin cu siña para hunto y mustra disciplina hunto. Keda critico, pero no lubida mantene bista riba realidad, anto pone diferencianan fundamental y desconfiansa cronico un banda. Corda cu net e desconfiansa ey ta loke ta pone cualkier grupo dividi y kibra nos.

Nos mester siña haya fe bek den otro. Fuera di contexto politico, social, ideologico. Los di si ami si ta kere den e peliger di e virus y cu mi ta kere den tuma e vacuna y abo no. Pa duro cu e ta awo, cu tanto polarisacion, oportunismo, rabia, duda y miedo, nos tin cu siña haya fe bek den otro como hende. Fe ta algo cu bo tin cu gana bek. Trahadornan den sector (semi-) publico lo por cuminsa gana poco di e confiansa den nan bek dor di leumind exigi y para hunto cu e resto di nos.

Fe ta un palabra grandi y keremi, ami mes tin masha tiki fe den humanidad, y francamente mi a perde hopi fe den e pueblo aki durante ultimo aña. Pero mi sa tambe cu asina so nos por mitiga e daño cu ainda ta na caminda. Kizas nos tine den nos pa uni, apesar di tur cos. Pero kizas esey ta mi mesun mundo di fantasia.