Bay den toque de queda, ohm!

Un pabien ta bay pa partido HTC cu ta e prome cu a bin cu un tipo di programa di campaña pa eleccion venidero. E logro ey niun hende por kita for di nan. Ta trata aki di no menos cu 65 punto. Entre nan e plan pa bin cu un paspoort digital cu tur bo datosnan y cu cual bo location por wordo traced tur ora. Ni na China! Bo no por bisa cu e muchanan aki no tin fantasia y no ta mustra effort, y pa aworaki esey ta conta, right? Pero hecho ta keda cu e programa di HTC ta loke ta pasa ora bo cuminsa huma OxyPlus recreacionalmente.

Toque de Queda a keda prolonga te cu diahuebs. “Considerando con e virus ta plamando cu un “positivity rate” demasiado halto, cantidad di testnan den ultimo dianan cu tawata hopi abou y awor por tuma nota cu e cantidad di testnan a aumenta, sinembargo esaki, combina cu e positivity rate halto, ta pone cu e medidanan tin cu worda prolonga”, segun e comunicado oficial. Mientras tanto, admisionnan na hospital ta subiendo tambe atrobe. E ola ta lantando. Awe atrobe tin 42 caso nobo. Awe Minpres a duna di conoce cu berdad turistanan ta teniendo nan mes menos na protocol y cu Crisisteam ta vuscando manera pa conscientisa Becky cu Garrett for di New Jersey mas. Sure, nan lo a test negativo prome cu vuelo of na airport, pero e bartender, front desk person, e waiter y e housekeeper ta esnan cu ta haya sa si no tabata djis nan viral load cu tabata mucho abou ora cu nan a test. Segun Tanchi no tin indicacion ainda si berdad e contagionan local ta bin for di sector hotelero. Mas tanto e ta bin for di varios caminda, y pesey ta pone TDQ como medida amplio. Pa hopi hende e ta keda duro pa guli, particularmente pasobra tin hopi inconsistencia den maneho y hende ta sinti cu no ta ley pa un ley pa tur. Ministernan mes ta bula bay Florida of tene fiesta grandi pa cumleaños di nan yiu y empleadonan di DVG ta wordo mira ta trip sin tene distancia social. Anto net di nan hende tin cu tende cu mester keda cas? Esey na dado momento ta bira poco lastig.

Minister di Educacion Rudy Lampe tambe a tene un conferencia di prensa den cual ela anuncia cu ta bay cambia nomber di Commandeur Pieter Boer Basisschool pa nada menos cu Xander Bogaerts Basisschool. Tambe Colegio San Nicolas ta bay wordo nombra na nan rector bieuw, Nigel Mathew. Pa ambos e honor sin duda ta grandi, pa the X-Man pasobra ta su scol bieuw y pa meneer Mathew pasobra pa hopi tempo e tabata conrector eynan. Bon noticia y sigur na su lugar, anto riba dje porfin un logro toch pa Rudy su cartera, aunke no tur cos ta pinta mesun bunita pa e minister. Durante su conferencia di prensa mi a puntre con a para cu infrastructura y accesibilidad di internet pa muchanan di scol si acaso lo mester bay bek na home schooling y nan lo mester sigui les online. Esey a resulta di a haya su, ehm, retonan aña pasa, pero den e lunanan cu a pasa lo mester a drecha un cu otro, right? Segun minister sinembargo e muchanan den caso di un lockdown lo mester bay depende riba nan celular pa por sigui les. Den Cayente a ricibi for di un docente (cu kier keda anonimo) e siguiente reaccion. Sabiendo cu e conflicto entre e minister y a lo menos un grupo den e veld di docentenan a para bira uno basta pisa y tin biaha tambe toxico, e ta bale la pena pa comparti:

"Si enseñansa ta cla pa un otro lockdown? Si cos nan a wordo poni en place desde aña pasa? No y no. Problema ta keda mescos. E Leerkracht y alumno no tin e devices necesario. Un smartphone no ta un device drechi pa sigi les. Un laptop of minimal un tablet drechi ta necesario. No a wordo inverti den e lesmaterial digital, por ehempel un basispoort y digitale versies di e metodonan cu ta wordo uza na skol. E upgrading via IPA tabata masha laf (mi opinion) y no echt direct inzetbaar door cu no tin e middelen. Por ehempel, e leerkracht mester un bon laptop, un camera, un bon mic, un lightring, programma nan pa edit video. Cosnan cu leerkracht no por paga uit eigen zak.

Mayor a upgrade nan mes? Awo si nan por lesa e opdracht? Corda hopi no ta domina ni Papiamento of Hulandes, tin biaha hasta Ingles drechi no por. Anto SETAR ta mesun crap. Si mi no mag huza e schoolgebouw den un lockdown manera biaha pasa, ta mi WIFI di cas atrobe tin cu wordo uza? Minister ta bende digitaal thuisonderwijs manera un cos facil manera bolter un swich. E no ta. Tampoco e ta homeschooling paso e ora e mayor ta encarga cu tur cos. E tin cu prepara e lesnan, duna e lesnan y toets e lesnan. Na ningun momento esey a pasa den 2020!

Mi por sigi riba e tema di lesnan na papiamento. Ningun di e metodonan ta full cla, of nan ta asina bieu cu no ta responsabel pa uza nan. Por ehempel esun di rekenen, awo den mitar aña escolar kier yega pats boem, bin uza e metodo bieu y ya afgeschreven na Hulanda. Veld no ta e problema, ta e con y kiko kier hasi ta.”

Mientras tanto, kabouter Knops ta bin pasa dia in de tropen. Aki dos luna tin eleccion na Hulanda y eynan tambe campaña ta on...Politica ta cruel, yiu!