Blue Monday

Blue Monday, e di tres dialuna di cada aña, ta e dia na unda segun estadistica mas hende ta conclui cu nan falta consistencia y cu nan plan di ‘new year, new me’ probablemente no ta bay funciona, pues cu nan lo keda mesun broke/infeliz/gordo/etc.. Awel ariba e dia aki mi ta continua cu mi resolucion di purba skirbi (casi) tur dia akiriba.

Ta awe tambe cu e hendenan tras di 24 Ora a lanza nan corant online ’Trempan’. Nan ta advertise esaki como un publicacion completo, cu tur loke bo ta spera di loke un corant local mester tin, pues banda di e noticia di dia tambe deporte, obituario, noticia internacional etcetera. Basicamente loke por ehempel un Diario tabata den su tempo di gloria. Kizas nan kier bay bek pa loke nan a lanta cune y cu den nan curazon nan ta kere cu pa tin un corant cu un front page y un deadline ta lo maximo cu tin den e negoshi aki. Kizas esaki ta un miho manera pa monitor usuarionan miho via tur tipo di trackers den e code di e paginanan. Sowieso bo e-mailadres ta oro pa nan y nan clientenan. Pero e promesa cu e ta bay wordo lesa y converti den value pa advertisers ta keda te eynan tambe, anto esey tin di haber cu e producto cu ta keda limita na kaweteria pa suceso y bomboshi. Hende ta gusta drama y ta gusta post comment, pero te eynan e engagement y e views ta duna added value. Kizas e pagina di obituario lo por ta un premium ainda, pero voor de rest? Anto riba dje e mesun producto di caya cu bo ta produci, e cos cu ta bo bread and butter y cu bo ta domina miho cu tur y cu ta bay domina bo paginanan con cu bay bin, TA GRATIS CABA. Kico ta e added value pami como lesador pa bay paga y lesa esey di nobo? Ta manera cu e hendenan aki a lubida loke ta nan edge: traha quick and dirty y duna gratificacion immediato na tur esnan cu ta sigui nan, nan fans y nan haters. Background? Analisis balansa? Entrevista drechi? Mi ta duda cu nan tin e calidad den cas pa produci esey pasobra te dia dia awe nunca nan a mustra e calidad pa haci esey. Hende y leadership pa haci net e tipo di trabou ey ta schaars, dus no ta completamente nan falta aunke cu e cultura den e compania - cual ta obvio pa pueblo henter - nunca lo conduci na un producto periodistico cu profundidad. Locual ta OK, by the way. Djis sa ken bo ta y wak pa bo ta e miho den ta bo mes. Te dia di awe e guynan aki tabata haci precisamente esey, y nan tabata exitoso tambe ni cuanto hende - incluyendo ami - a critica. Anyway, nos tus sa di overreach di bes en cuando. Sinembargo e look, e lay-out y mas ainda e rollout di Trempan ta mustra tremendo y e idea di bende scratchcards pa por lesa un edicion ta genial. Pero pa bay bek den e manera tradicional di traha un ‘corant’ anto bin cu practicamente e mesun producto den un bachi nobo, cu awor mester bay paga p'e? Nah.