Chubato den cashi

Un bululu formal riba social media ora cu mayornan a cuminsa keha riba presentacion pa scolnan basico di e obra teatral ‘E Cashi Magico’ na Cas di Cultura. E obra 100% local aki ta trata e tema di aceptacion y tin como mensahe na muchanan cu ta importante pa ta bo mes, cu hende por ta diferente y cu tin espacio pa diferente manera di biba. Den palabranan di Cas di Cultura: "E obra ta hibabo den e nucleo familiar di e personahe principal, cu ta un di tanto ehempel di ciglo 21. Daniel y su mamanan ta enfrenta y soluciona retonan hunto cu tin di haber cu 'bullying' na scol." Bo lo pensa cu lo no tin nada robes cu e topico aki, sinembargo, cierto mayornan y docentenan no tabata mucho di acuerdo cu hecho cu personahenan central den e storia ta un famia cu dos mama y un yiu. Segun nan lo no a duna notificacion di esaki di antemano, causando cu muchanan lo a haya nan mes exponi na homosexualidad. E mayornan concerni ta haya cu esaki no ta un topico cu nan lo kier pa nan yiu wordo exponi na dje y tin hasta cu ta kere cu lo trata di un complot pa indoctrina nan yiunan pa bira gay. Hasta World Health Organization, mainstream media y tur otro supuesto culpabelnan di e pandemia, vacuna, 5G y Great Reset a wordo hinca aden. Pasobra obviamente mundo kier pa bo yiunan daña nan mente y converti nan mes den transgender, homo cu lesbiana. Y dimes cu e plan diabolico ey lo mester wordo ehecuta via teatro, den cas di Cultura. Panico y histeria total riba Facebook. Pero si bo wak bon ken tur ta keha, ta hopi bisto cu ta trata di miembronan di e tantisimo misanan, sea e cultonan di diesmo of esun catolico. No cu esey riba su mes ta algo malo, pero ora nan uza e argumento falso di ‘ami ta respeta tur hende nan manera di biba, pero…’, siendo cu nan doctrina ta forsa nan pa haci lo contrario ta zona basta bashi y hipocrita. Hecho ta cu hopi di nan ta fingi di kier discuti abiertamente, te ora puntje yega paaltje y nan actitud te hasta ta bira represivo. Hopi biaha nan ta purba di aparenta di ta habri y moderno pero e laag di verf barata ey di baina ta wanta riba e frusto di nan dogma.

Lagami pone bon cla akinan cu mi ta di acuerdo cu cada mayor mester por dicidi kico nan yiu ta wak of no. E argumento cu no tur mucha ta cla pa cierto topico por ta valido, basta cu e ta sincero si y no un excusa pa no ofende bo amigonan gay y bo peluquero. Sea consistente, of a lo menos para pa bo homofobia. No bay impedi bo yiu di wak un obra cu ta propaga tolerancia anto abo mes ta bay wakun comedia den mesun Cas di Cultura den cual jokenan dobbel sinti y referencianan na adulterio ta skeiro di comienso te fin. Stop di scucha reggaeton tambe den auto cu bo muchanan. Stop di hinca bo yiunan den bikini cu make-up anto laga nan pose sugestivamente anto cu e mesun energia ey grita cu mester mata e mesun pedofielnan cu ta wak e picsnan di bo yiu cu bo ta post. Stop di defende hendenan den farandula cu ta conoci di ta core tras di menornan di edad y ta end up te hasta casando cu nan. Y abo mes tirando aroz riba nan panera un sokete ciego. E hipocrecia serka hopi ta cansami. Pero henter e bululu aki sigur tambe tin su parti alentador. Pasobra loke mas a resalta ta cuanto hendenan si a para defende ‘E Cashi Magico' y su intencion. Un cantidad grandi di hende riba nos isla si ta compronde pakico un mensahe asina ta importante pa muchanan wak y siña. Esey ta duna speransa. Aruba pa un of otro motibo semper tabatin un representacion fuerte di personanan LGBTQIA+ y mas y mas hobennan queer ta sali dilanti sin miedo of berguensa pa ken nan ta. Bo ta wak tambe con den nan grupo di edad pa grah parti nan ta wordo acepta tambe. Diferente di nan ta goza di fama y a lanta negoshi exitoso. Nan estilo di biba ta nan brand. Awo, esey lo kiermen cu na Aruba tin un nivel di aceptacion aceptabel, toch? Of nos tolerancia pa nos amigonan, famia, tastemakers y hende cu style den comunidad tin limite? Paso toch un holor di esey a bira obvio un biaha mas cu e discusion aki. Pa miedo di nan misanan, gobernantenan ainda no ta durf di legalisa pa personanan di mesun sexo casa, algo cu hasta na Cuba por haci awor danki na un referendum den cual un mayoria absoluto a bisa si na igualdad. Pero na Aruba nos ta laga un grupo intolerante sigui secuestra henter un comunidad. Pakico laga sernan humano, nos rumannan, primonan, tio cu tia, amigonan y tin biaha hasta mayornan pasa dolor asina. Nos comunidad ta uno den cual homber y muhe, hobennan y hende di edad, aparentemente mester sigui sufri den silencio. Pio ainda awor cu nos ta bibando den un epoca den cual masculinidad toxico ta wordo propaganda y bendi manera algo bon. E idea di e macho alpha, bendi pa profetanan falso manera Jordan Peterson, Joe Rogan y Anrdew Tate. Parse cu mas cu nunca nos mester di e mensahe di tolerancia, compasion y amor propio cu ‘E Cashi Magico’ ta propone. Un cos mi por bisabo: Mare nan tabatin E Cashi Magico ey tempo cu ami tabata mucha. E ora kizas lo tabatin menos bullying, depresion, suicidio, alcoholismo, adiccion, abuso di pareha cu yiu, rape, hende grandi skapa bibando un mentira completo pa apariencia…Pero ja, chubato crioyo nos ta .