press to zoom

press to zoom

press to zoom
1/2
  • Ariën Rasmijn

E cortina di hero


Mi no sa si bo a lesa e articulo di De Groene Amsterdammer, den conhunto cu Argos di VPRO y Investico, den cual ta habri e beerput completo di con na Corsow e mundo di online gambling a practicamente tuma mando eynan. Si bo no a lese ainda, bay eynan awo anto lese. No ta prome biaha cu De Groene a bay diep anto sin vaseline den loke ta bay robes den e parti aki di reino (recordar es vivir!) y ami personalmente ta aprecia cada biaha cu nan ta hinca tempo, energia y recursonan pa haci periodismo di calidad riba topiconan cu ta toca nos. Pasobra e hecho tristo ta keda cu nos mesun prensa local simplemente no tin e capacidad pa haci e tipo di trabou aki riba e nivel cu ta rekeri. Den caso aki no menos cu tres medio mester a uni forsa pa por yega na un storia sin precedente den cual ta indica cu e sector di online gambling na Corsou, den cual biyones di dollar ta circula tax free y cu nan mes ta regula nan mes sin ningun control di gobierno, siendo cu e sector ta pesta cu hende di baho mundo cu no ta riña pa silencia esnan cu por ta critico riba nan poder y influencia. E articulo ta menciona Gregory Elias, doño di di entre otro Curaçao North Sea Jazz (y cu tambe a hera bira doño di Banco di Caribe) y empresario Robbie dos Santos como personahenan clave den e mundo aki y te hasta ta indica cu e ordo pa mata e politico Helmin Wiels lo a sali for di e sector di online gambling, cu lo ta un wasmachine internacional, operando cu impunidad total.


Bon periodismo, tambe ora e topico ta toca no abo pero - por ehempel - bo bisiña, ta ponebo pensa riba bo mesun situacion. Aruba danki Dios no tin un sector di online gambling y berdad, nos a haci trabounan pa cumpli cu e rekisitonan cu Financial Action Task Force a impone riba nos tanto aña pasa pa combati labamento di placa y financiamento terrorismo. Entre otro nos a elimina AVV for di nos registro pasobra e rechtspersoon ey practicamente a wordo diseña pa sconde ultimate beneficiary owners cu tabata habri negoshi cu ayudo di trustkantoor. Pero loke nos a haci tabata suficiente?


Claro, Aruba no ta e Aruba mas di tempo cu mafiosonan tabata djis cana kibra cu un saco di placa y lanta un Visage nighclub. Pero cada tanto tempo ainda cosnan ta pasa na unda bo mester puntra bo mes si no ta bale la pena pa haci mas pregunta al caso. Manera poco tempo pasa hasta medionan a raporta di un Boeing 747 procedente di Paraguay yena cu cigaria caminda pa Republica Dominicana. Aparentemente un compania local den Free Zone a manda buska e cargamento aki. Net for di Paraguay, cu ta conosi historicamente pa su exportacion illicito di tabaco…Ami a mane haya un vibe di back to the 80’s pero, manera semper awo, niun musca a bula, niun hende a puntra nada y hendenan cu tabata sa y tabata den posicion pa cuestiona, no a bisa nada tampoco. Por wel di ta cu no tabatin nada pa cuestiona tampoco, pero pa kico no hacie toch y a lo menos mustra cu bo no ta drumi? Aruba ta un pais liber na unda cada ken por haci esaki, toch?


Y que hubo di casonan andando contra ex-ministernan Sevinger y Oduber? Den caso di Sevinger tabatin entrada hudicial den trustkantoor. Esey caba ta ponebo puntra con a para cu e handel en wandel di e tipo di companianan aki. Den caso di Oduber e storia ta cu e lo ta ultimate beneficiary owner di cantidad di compania. E ora bo lo puntra bo mes: si e acusacion aki ta berdad, e ora con e lo a hacie? Kizas na e mesun manera con Venezolanonan den exilio na Aruba a parkeer nan miyones na ABB Bank, pues via testafero, of miho bisa stroman na bon Hulandes? Esaki sowieso ta otro ehempel mas di algo cu kizas a slip pasa e control di esnan encarga cu cumplimento cu exigencianan di FATF, cual por cierto a tene su cita regular cu gobierno poco tempo pasa. Boshi negoshi a wordo cumpra y lanta pa Venezolanonan na e manera aki, esey ta un hecho. Pero tiki a wordo cuestiona pa loke ta di unda berdad e placa aki a bin. E ultimo dos gobiernonan a wak otro banda y te hasta a facilita pa cosnan tuma lugar cu a lo menos lo pone wenkbrauw lanta den otro pais. Banco Central a bin cu rapport indicando cu pueblo no ta confia gobernantenan y ta mira corupcion den ambos sector publico y priva, pero hopi mas cu esey no ta wordo haci. FIU a caba di publica su cuentanan anual di 2017 pa 2020, indicando entre otro cu MOT falta sosten structural pa por opera optimalmente. Mientras tanto, hende - incluyendo periodistanan, incluyendo ami tempo di mi tempo tambe - ta keda cu miedo pa habri nan boca pasobra nan a wak kico a pasa cu Helmin Wiels y Poentje Castro. Y hopi hende awendia te hasta ta ambia pa por ta den posicion pa por haci bagamunderianan similar, pasobra na final ta cada ken pa su mes toch.


Prensa tin un rol hopi importante den comunidad. Su rol ta bay hopi mas leu cu djis traha noticia. Prensa tey pa trece contexto y splica na un manera cla kico ta pasando pa pueblo saka su mesun conclusionnan. Prensa tambe tey pa cuestiona, haci preguntanan inteligente y cu curashi. Pero na Aruba hende ta wak esey como ‘falta di respet’, y prensa su rol hopi biaha ta wordo malusa pa sirbi na prome lugar interesnan particular y politico di un ruling class. E mesun periodista ta bisti dos petchi simultaneamente y ta traha propaganda pa esnan cu e mester cuestiona. Por ehempel: na ningun momento den e discusion cu awor ta andando pa loke ta e reforma fiscal y introduccion di BTW, ta puntra gremionan comercial pakico nan ta hasta full contra partinan di e reforma, cu in the long run lo beneficia nan pero cu kizas awor lo expose cu nan negoshi, sea ta un hotel of mega-supermercado, eigenlijk no ta sostenibel (mas) riba nos isla y cu nan lo mester ahusta. Pasobra nos comunidad ta chikito y e mesun sistema di clase di 100 aña pasa ta keda vigente, e manera di traha den cual ta core tras di accident y haci bomboshi ta keda esun cu ta prevalece. E argumento ta cu tipo di storianan aki ta haya mas views, locual mi ta kere tambe ta berdad. Pero haci esaki ta hopi mas dushi, facil y conveniente tambe cu morde e man cu ta dunabo e pida pan di cada dia. Pa purba haci otro, purba wak tras di e cortina di hero y investiga con cosnan ta move di berdad ta practicamente imposibel. Tin cu a purba y a give up. Medionan awo mas cu nunca ta struggle. Ami mes no por a yega mas leu cu skirbi e columna aki den cual a lo menos mi por a tuma e espacio pa haci preguntanan. Hecho cu mi por a haci esey ya caba tabata un glitch in the matrix pasobra mi dunador di trabou - cu pa colmo awor a caba na nada - tabata afo di e isla y ami mes tambe no a lanta na Aruba, pues tampoco a lanta cu mucho respet pa hendenan cu autoridad riba e isla. Pero den tur e añanan aki, casi nunca mi a logra haya un contesta cu mi por a pone den un articulo periodistico cu mencion di fuente.


E ta y lo keda sumamente dificil pa por conta e storianan cu di berdad ta splika con poder ta move na Aruba. Esnan cu por hacie ta parti di e mesun structura ey y hamas lo habri nan boca si no ta perhudica ‘e otro banda’. Y hasta si nan lo hacie, nan lo troce e berdad. Y esnan cu a purba nunca tabatin un chens. Por ta e unico manera cu lo por conta e storianan aki lo ta a travez di obranan di ficcion den cual nombernan a wordo cambia, pero hasta asina mi ta kere cu niun hende lo kier publica nan pasobra e manera con pa generacionnan largo nos a kibra nos mes te na e punto socio-economicamente fatal cu nos ta awor, lo ta mucho dificil pa kere.

0 opmerkingen
Ad SETAR Complete 60+.gif