Feestvierend Ten Ondergaan - The Sequel

Cada biaha, sin faya, mi ta keda sorprendi ora mi wak con gobernantenan ta logra lombra pueblo su wowo pa distrai hende for di e topiconan cu di berdad ta relevante. Awo, for di nada a anuncia un asina yama ‘Parada di Luz Nacional’, pa asina celebra e exit strategy di nos isla for di e pandemia. Un pandemia cu no a ni cuminsa di caba na drechi. Awo numa nos ta den e temporada di Omicron, sin niun garantia cu e proximo variante iminente lo ta mas leve ainda. Pero algo ta bisami cu e fiesta aki no tin mucho di haber cu un exit strategy (bo lo pensa juist cu nan lo kier evita un otro ola mas...) pero mas tanto cu purba di fomenta ‘union’ y goodwill pa un gobierno cu durante ultimo periodo a keda entrega na popularidad. Y ban ta franco, mas cu cualkier holo di capacidad y dominio di bon gobernacion, popularidad ta loke ta conta berdaderamente pa esnan cu ta bisti bachi cu pin di escudo den Cocolishi. Pa añanan tras di otro loke ta wordo tira direct of indirect riba facebook ta parse di ta e compas nacional y loke ta tene ministernan drumiendo malo tur anochi. E energia cu e lidernan di nos pais ta hinca den saka portret, buska quote ‘inspirativo’ y hinca tur esaki den otro riba nan telefon ta literalmente tur loke ta falta na maneho consistente. Pero ora caya bira hot, cu sindicatonan cla pa pone aparato gubernamental bay plat pasobra gobierno no por a ni ta sincero y porfin bisa nan e berdad cruel di e futuro di nan empleo, e ora si esnan den Cocolishi sa con pa cambia e topico. Pasobra bo mes sa, macaco bo ta haci contento caba cu un bacoba so. Cu tanto carnavalista den posicionnan clave e idea lo mester a surgi mane di mes: “Ban pone un parada.”

Nos ta mey mey den loke mester a bira otro temporada di carnaval y, manera nos hendenan gusta copia di nos rumannan Latino, el cuerpo lo sabe. Esaki lo tabata nos di dos aña consecutivo sin nos fiesta preferi. Y si ta un cos nos pueblo mester di dje awo ta carnaval, mas ainda despues di un aña electoral. Anto pesey e move aki ta asina cinico, pa mi no bisa vies. Di baina Aruba a cuminsa lanta bek economicamente, hopi famia ainda ta pasando den duro, cu entrada insigur y un inflacion cruel matando e tiki cartera cu nan tin. Anto riba dje nan cuido a wordo corta di un dia pa otro. Ambtenaarnan cu prome a wordo gaña cu nan posicion nunca lo wordo cuestiona, awo a wordo gaña cu e recorte di 12,6 porciento tabata pa cubri fase, pa despues haya nan mes ta mira con coleganan den otro departamentonan si a keda cu nan salario completo. Nan mester a para mira con gobierno a keda tuma hende yega riba contract, extende e contractnan cu tabatin caba, promove hendenan yega na nan na puestonan cu nan ni a studia drechi p’e, keda haci photoshoot pa nan mes, te hasta keda abusa di nan faam y posicion. E ambtenaarnan aki, si bo ta di acuerdo cu nan cantidad, nan funcionanemento y beneficionan of no, tin nan razon awo pa ta rabia. Aruba ta pasando den e parti mas pika di e crisis social-economico y financiero mas grandi di su historia. Pero hasta den e momento di berdad aki nan ta prefera di hinca nan cabes den santo, hunga mooi weer y nenga categoricamente cu dos aña den e crisis aki ainda cos ta berans y lo keda berans pa hopi largo. Manera e mama cu riba diadomingo ta forsa su hari den misa, ta desmenti loke henter e bario sa caba di loke ta pasando den su cas y ta hinca un 25 florin extra den e saco di collecte. Pa sera hende nan boca. Y esey mes nan ta haciendo awo. "Nos ta duna boso loke boso kier. Ata bo chupabebe. Of miho bisa, bo bacoba. Bay djodo y stop di critica."

“Cos ta malo? Coi loco! Vamos bien!” Ban pone un fiesta. E mesun acusacion di ‘Feestvierend Ten Ondergaan’ cu Evelyn Wever-Croes a trece na 2012 ta conta awo pa su mesun gobernacion. Y ta parse awo cu no tin ni logica mas. Aruba ainda ta riba level 4 di CDC na Merca y no tin manera pa argumenta con pone miles di hende riba caya hunto sin mondkapje y cu alcohol ta bay yuda reverse esey of yuda e asina yama ‘exit strategy’ aki den cualkier forma. Of cu somehow placa lo bay lora e anochi aki. Cua placa? Pa e musiconan envolvi lo tin un cachi cachi cu berdad lo yuda nan pa algo despues di dos aña di secura (for di unda ATA a saka placa pa subsidia grupo y banda diripiente?!), pero esaki mester hustifica un malcontento y riesgo mas grandi pa tanto otro hende? Asina tanto pregunta y asina tanto reaccion negativo tambe cu e anuncio di e Parada aki a lanta, anto pa ki motibo? E cinismo, te hasta e luhuria kizas mi por imagina, pero no e bobedad cu lo pensa cu despues cu DOW piki e baricadanan bek dia 26 y hende cuminsa bay nan cas atrobe, pueblo lo no keda mesun rabia y confundi pa cu e falta di rumbo, weso di lomba y consistencia cu gobierno ta desplegando aworaki. Pero ja, parse cu un biaha mas nos ta mira un caso di ‘play stupid games, win stupid prizes’.