top of page

press to zoom

press to zoom

press to zoom
1/2
  • Ariën Rasmijn

Gradecido


Poco dia pasa tabatin Thanksgiving Day (of manera ta bisa na Aruba awor, Dia di Gracia) y mi amigo Soto a bise hopi bon: Dia Jandino a bisa cu ‘Aruba no tin su mesun identidad’ y ta djis adopta di tur caminda, hopi hende nan chip a kima, awor tur hende a nay celebra cultura di otro hende na grandi. Pero ja, esey ta ken nos ta. Nos ta absorbe di tur caminda y riba su mes no tin nada malo cu esey. Carnaval, gaita, te hasta e discusion rond di Zwarte Piet nos a importa. Riba caya nos a bira mas Colombiano cu e Colombianonan mes, te cu nos ta leumind celebra casamento na cas y hiba full e fiesta pa Medellin. Nos ta celebra Halloween manera Mericano, bailando reggaeton y dembow manera Boriqua y Dominicano y ahogando nos dolor den vallenato cu un boter di Old Parr, mas Paisa cu Colombiano mes. Ami personalmente ta haya tur esaki tremendo. Adopta y adapta semper tabata e superpower di nos Arubianonan. Nos tabatin masha tiki di nos mes pa cuminsa, y nos a traha nos mesun paraiso cu tur loke nos por a fia (manera ayaca) of horta (manera carnaval) aki aya. Mas great ta pa mira e nietonan di imigrantenan crese, resalta y defini kico nos pueblo ta para p’e. Esnan cu ta keha mas tanto ta e bieuwnan cu tin un memoria falso di patrimonio y ainda ta kere cu por manda hende bek pa nan pais, lubidando cu nan mes tin sanger di afo coriendo den nan venanan. Pero si bo studie bon, e propio historia di Aruba ta mustra cu nos semper tabata un comunidad chikito y dinamico. Influencianan di afo semper a drenta y a crese raiz riba nos tera. Y apesar di e dogmanan fuerte di Catolicisimo, disciplina familiar, custumbernan y supersticion, e dinamismo ey semper a prevalece treciendo un espiritu di innovacion cu a causa cambionan grandi y impactante den nos sociedad manera e refineria, nos tursimo y nos Status Aparte. Pesey ami semper tin cu hari ora hende kier resisti cambio, sea grandi of chikito.


Poco tempo pasa hende a rabia pasobra lo bay tene prefinalnan di Caiso & Soca Monarch den lunanan di november y december. Segun nan esaki lo kibra e tradicion navideño. Un ridicules pasobra niun grupo di gaita ta toca na november, benta di kerstboom cada aña ta mas laat y hasta misa di aurora cada aña ta mas bashi. Y ban serio, e tradicionannan cu ta resta ni ta wordo respeta na drechi. Antes tabata pena la bida si radio tabata toca gaita prome cu aña nobo. E bieuwnan lo sali na gritamento y cu slof na man pasobra toca dande mucho trempan lo causa mala suerte. Aña pasa ami mes a spanta ora m’a tende un radio los un dande den pleno juli. Niun hende a keha. Awo pasobra kier organisa evento carnavalesco despues di 11-11 (y pa bon motibo), mundo si a bira mucho chikito pa un paar di hende. Danki Dios cu poco poco nan ta perdiendo nan mayoria. E generacion ey gusta papia di norma y balor, pero net nan a tapa tur tipo di abusonan pa scapa cara.


Ami si tin mi confiansa firmemente deposita riba e generacionnan cu a bin mi tras. Hende bieuw (incluyendo hopi hende di mi edad) gusta yama nan floho y malcria, pero e berdad ta cu nan sa masha bon cu e manera di traha y biba cu nos a laga pa nan simplemente no ta sirbi. Nos no a laga pa nan otro cu un sistema financiero daña den cual ni un cas nan por cumpra mas pero den cual ainda nan lo mester traha te cu nan muri, y un naturalesa y medio ambiente cu ni por wordo scapa mas. Y hasta asina den tur esaki nan ta mustra di ta generacion mas inclusivo, creativo y socialmente adapta di tur. Mi generacion lo a djis kima tur cos si esaki tabata e mundo cu lo a wordo laga pa nos. Mi generacion ainda ta discrimina contra muhe, ainda ta homofobico y ainda ta chupa tras di politiconan cu no ta worry cu nos. E boomers prome cu nos a habraca tur e recursonan y nos a djis para wak pa beneficia di e kiriwichinan cu nan a laga pa nos. Nos no a cambia ni drecha nada. Esnan cu a bin despues di nos a keda cu nada pero a dicidi pa traha nan mesun reglanan pa loke ta bida, trabou, prioridadnan y genero.


Un di e personanan mas impresionante cu mi a yega di wak na Aruba tabata un guy cu no por tabatin mas cu 18 aña cana den pleno fakkel den full make-up, yen confianza manera cu Beyoncé a horta su style for di dje. Bo no por a wak niun worry den su cara mientras cu sin duda alguno algun hende lo mester a dune un bista mahos of bise algo pa insulte. Tiponan asina ta defini e dicho ’sin miedo’ hopi mas cu e machonan crioyo y esey tambe cu e añanan cambia e discusion publico den nos pais. Otro muestra mas di con na final di cuenta, apesar di tur controversia, tur joke y tur biaha cu misanan catolico y di diesmo ta purba di pusha nan agenda, nos pueblo tin mas compasion y ta mas progresivo cu hopi hende lo kere of bisa. Pa chikito y simpel cu nos por ta. Anto eynan e respet pa nos ta crese di berdad. Y ta pa e generacion nobo y pa esnan cu ta stima nan prohimo y nan pais di e forma puro y sin juicio aki…Ta pa nan mi a skirbi e columna aki pa casi 10 aña largo. Un decada increiblemente bunita y emocionante, cu semper lo marca mi y cu lo termina definitivamente tambe cu seramento di e aña aki y pa cual ami ta profundamente gradecido. Pero ta su ora. Nos tin un paar mas pa bay. Pero di awor caba, masha masha danki.

0 opmerkingen
Ad SETAR Complete 60+.gif
bottom of page