Jump and Wave

Ayera ta 35 aña pasa cu Aruba su Status Aparte a drenta na vigor. Tambe ta 35 aña pasa cu Betico Croes, arquitecto di e Status Aparte den su forma final y esun cu a logre, a haya un accident tragico cu a conduci na su morto casi un aña despues. No tin motibo pa celebra, pasobra 35 aña despues no a resta hopi mas di e autonomia cu tanto a bringa p’e. Kizas como pais nos nunca tabata full madura pa carga asina tanto responsabilidad, pero nos a purba si y na final un pandemia cu ta yega cada 100 aña tabatin mester pa kibra nos ilusion. Anyway, pabien toch.

Ban wak con nos ta bay sigui despues di e prome kwartaal ora mester cuminsa bouw af FASE y loonsubsidie. KvK a anuncia poco dia pasa cu segun nan encuesta, 1 den cada 3 compania cu a participa ta haciendo uzo di loonsubsidie. Fuera di esey, mas y mas ta mustrando cu sector priva ta den crash. "Un parti grandi di e encuestadonan (37.3%) ta kere cu nan ta core riesgo di mester cera nan negoshi permanentemente debi na e crisis actual. Un poco mas cu 5% a indica cu e riesgo ta real y cu hasta dentro di un luna nan mester cera nan porta caba. Den totalidad 13.2% di e comerciantenan ta pensa cu probablemente nan tin cu cera nan negoshi dentro di 3 luna, y casi 1 den 5 comerciante a indica cu probablemente nan mester cera nan negoshi dentro di 6 luna. E otro companianan ta opina cu probablemente nan negoshi lo sobrevivi e crisis di Covid” , asina e comunicado di KvK ta laga sa, indicando cu e cifranan aki ta bira un tiki pio si acaso no flexibilisa e mercado laboral y laga dunadornan di trabou manda hende cas (pa laganan cuminsa cobra FASE of despues WW, pues dump nan den scochi di gobierno) mas facil. Esaki ta loke nan ta yama un Gordiaanse Knoop. Mas bo ranka pa purba los e, mas e ta primi un otro caminda pa chokabo toch. Tipo di cosnan aki ta asina depressing cu no ta strañami cu Baby di Aña a tuma mas tempo pa sali. “Dunami 9 luna mas! Por ta ta bay ta miho e ora ey…"

Meanwhile, loke di berdad ta molostia nos mas cu tur cos ta hecho cu awe probablemente nos lo por a jump den Fakkel, si no tabata pa e marrrdita Covid ey…