Machete

Hopi gritamento ultimo dianan riba si Aruba ta bay haya aanwijzing of no y riba ken ta traidor of anti-Arubiano. Rijksministerraad a bin y a bay y basicamente e proceso pa cu un aanwijzing - un proceso cu ta conosi serca e politiconan na ambos banda di e discusion - a start. Riba dje Aruba tin te oktober pa cumpli cu e exigencianan di CAft pa loke ta presupuesto 2022.

E señal cu a duna ta hopi cla: gobierno di Aruba tin cu tuma recomendacionnan di CAft y e puntonan di Landspakket na serio. Pero gobierno ta mucho druk cu purba di mima nan votadornan, post afirmacionnan positivo riba Facebook y complace sindicatonan cu ta wordo controla pa un oposicion cu te dia di awe no por crea niun momentum pasobra nan no tin e boluntad ni e focus pa haci transformacionnan necesario. E unico palo cu nan por dal cune ta e lidernan sindical cu pa un of otro motibo sin logica ainda ta lia na nan. Y e palo ey aparentemente ta suficiente pa pone spanto den Cocolishi. Cacho mancaron bringando cacho miedoso. Aruba ta practicamente ingobernabel asina, and it shows. Tur dos banda ta blaf disparate riba caya. Un ta rabia pasobra e machete no a cay, mientras cu otro ta celebra pa exactamente mesun motibo. Pero e unico cos cu na final ta tende ta blafmento den bashi. Y den tur nan gruñamento niun di dos ta menciona e hecho cu e machete ta fila y riba mesa caba. E blafmento ta pa consumo local pero ja, cachonan cu ta blaf no ta morde. E uniconan cu ta core nan tras ta nan carpatanan. E mesun 100 hendenan cu ta defende nan cu alma y cuerpo riba facebook y cu ta core bay VNO of parlamento pa entrega cartanan cu no ta wordo lesa. Nada ta cambia. E mesun weganan cu a faya ta wordo hunga atrobe cu e speransa envano cu e biaha aki si cambio ta bay bin, Hulanda lo cambia postura, gobierno lo cay. Hecho ta cu ambos AVP cu MEP sa masha bon cu nada di esaki lo pasa. Tur esaki ta djis maniobranan pa mantene nan siguidornan activo y purba keda relevante. Nan sa masha bon cu aanwijzing ta on y loading, con cu bay bin. Pero mientrastanto e circo tin cu continua.

E pantomina cansa di semper: Tur dos ta acusa otro di ta traidor y bende patria. Tur dos ta claim di ta doño y protector di Aruba su autonomia. Pero pa nan tur dos henter e asunto aki ta un wega di tikkertje politico, nada mas. "Abo a haya aanwijzing, lero lero lero.” Ambos banda sa cu aanwijzing no ta gran cos toch. Esey ta pasobra Aruba hopi tempo pasa caba a perde gran parti di su autonomia. Ta nan mes a tire afo. Gobernacion tras di gobernacion a corumpi, malogra, malgasta y prostitui patrimonio na amigonan, famia y ‘inversionistanan’ stranhero cu a habri cartera pa nan. Na Aruba nos ta te hasta braza e colonizador economico for di Merca y Venezuela. Djis nan tin cu pone 200k riba un cuenta local pa nan ta haya VIP treatment. Pero ora ta trata di CAft, COHO y TWO, diripente tur hende kier ta mas nacionalista cu Betico. Como periodista mi a atende cantidad di conferencia di prensa di CAft. Tambe mi a entrevista Gradus y aunke CAft como instituto sigur NO ta perfecto, mi impresion semper tabata cu - aunke cu nan ta keda mustra riba e bottom line - nan preocupacion na final ta pa yega na un economia sostenibel y resiliente pa tur Arubiano. E mensahe ey semper a shine through den loke Gradus tabata keda insisti riba dje: utiliza bo ganashi pa crea surplus y drecha bo finanzas publico pa caba. Traha dam pa tur por bebe. Pero e unico reaccion cu tabata bin for di e Arubianonan na otro banda tabata puro yoradera y rechazo a base di un orguyo falso y hipocrita. Pasobra cu e mesun boca cu nan ta scupi nan gal y chupa pa placa pa nan ‘fundacion’ nan kier papia di berguensa y violacion di nos autonomia ora e macambanan hera bisa algo. Violacion di kico? Loke a resta na oportunidad pa politiconan local haci y deshaci te ora OM bin cu un investigacion uzando nomber di delaster flora y fauna? Anto cuidao un hende fada y bisa cu nan no ta mind pa e macambanan tuma over un rato pa haci schoon schip y pasa basora. Pasobra e mesun partidonan cu a practicamente roga companianan Hulandes liga na CDA pa bin lanta oficina masalmente akinan (cu tur consecuencia pa nos real estate y comercio local) y a manda rapport di ‘Feestvierend Ten Ondergaan’ y roga pa Hulanda practicamente interveni den gobierno local, ta bay acusabo di ta ‘pro medida’ of - mas pret ainda ‘anti Aruba’. Laga nan. Anti Aruba ta ora bo pone interes di bo grupo riba interes general. Anti Aruba ta ora bo no ta tuma pasonan necesario pasobra bo no kier pone bo grupo rabia. Anti Aruba ta ora bo haci lo corecto anto purba bende e storia cu bo ta kitando peso for di pueblo mientras cu bo ta juist hise manera ta e caso cu schrapmento repentino di BTW.

Si nan bisabo cu bo ta desea malo pa bo pais, bisanan cu bo ta juist desea malo pa esnan cu a malogre. Esnan cu ta mas bakia den trapa nos mesun estado di derecho cu e Hulandesnan lo por den henter nan historia (anto esey ta bisa hopi, mirando nos historia colonial). Ami ta stima mi pais. Mi ta sinti berguenza cu te dia di awe dos grupo na Aruba so por bay dilanti y cu e unico motivacionnan cu semper lo keda prevalece ta mantencion di dinastianan politico y economico di djis un paar di famia. Hendenan cu si nan no tabatin e falta di berguenza pa trapa riba otronan, hamas nan lo tabatin caminda pa cay muri den e mundo aki. Pa nan mi ta desea un fin di e bacchanal cu a dura pa generacionnan largo y cu lo a sigui si no tabata pa e mesun roofbouw cu nan a haci riba nos pais cu a resulta den nos collapse economico durante e pandemia y e intervencion di e macambanan. E machete di aanwijzing ta pa nan, y pa nan so pasobra e consecuencianan ta politico. Y aunke e por afecta bo orguyo, probablemente e lo resulta den un miho futuro pa nos pais unabes cu e trabou di pasa basora caba.