Resumen politico 2021

Articulo aki tabata destina pa un otro publicacion, pero a wordo rechaza pa motibonan cu e autor ta compronde y acepta. Den e version aki a añadi mas texto, pa duna refleho na acontecimentonan recien.

2021 no tabatin falta di crazy stunts den Cocolishi. Mientras cu Covid a keda wanta nos pais den su gara, Tanchi Evelyn y su team tabata purba di cumpli cu e requisitonan pisa cu secretario di estado Raymond Knops y CAft tabata keda impone a cambio di asistencia financiero. Anto den tur esey tabatin un campaña electoral tambe. Uno cu a wordo accelera na momento cu a lanta un caso penal contra Alan Howell, cu poco tempo prome a bira lider di POR despues cu tur tres capitan di e barco a ‘abandon ship’ pa laga e timon letterlijk den man di e ultimo matroos.

Tin cu ta bisa cu asina a orkestra e tumbamento di Gabinete Wever-Croes I na un manera magistral na unda tur partido politico - incluyendo esnan cu tabata den wordo lanta formalmente - a wordo sorprendi cu letterlijk nan carson na rudia ainda mientras cu partido MEP como practicamente e unico sobreviviente di e coalishon tabatin practicamente tur cos cla pa ranca sali caba. Rivalnan manera Marisol Lopez-Tromp y Lisette Malmberg mester a letterlijk resucita partidonan zombie pa por participa y den cas di partido berde di baina lider a haya chens pa limpia e baba di soño for di su boca pa bay traha.

A gaña recycle material di campaña y a buska tur tipo di manera pa aglomera apesar di tir advertencia di DVG y e tension durante e campaña aki tabata asina extra pisa cu candidatonan a overheat y kima nan chip na caminda. Selene Kock, un dokter di pulmon notabene, tabata participa den e tipo di aglomeracion cu ni un paar di luna prome e tabata roga pueblo pa evita anto a flip famosamente y daña un mic durante un discurso na Pos Chiquito. Durante debate, politico nobo Miguel Mansur tambe a flip na dado momento pero den esey a logra pone Tanchi Eve mustra un banda menos bunita cu tiki biaha ela saka. No cu esey tabatin efecto alguno riba un resultado aplastador den cual Tanchi porfin a prueba su mes como votegetter absoluto, kibrando tambe e competencia den su mesun seno biniendo for di Nel Oduber su principe heredero Dangui particularmente.

Hunto cu parttime modelo (pero no di D-Shop…) Xiomara Maduro, Danguillaume a perde cantidad di voto apesar di un campaña miyonario den cual curiosamente ex-enemigo mortal y supuesto ex-politico Otmar Oduber tambe a yuda un of dos man. Oduber, te ainda sospechoso den caso Flamingo, tambe a campaña duro hunto cu su staf anterior pa Rocco Tjon, cu na final a logra bira minister di Husticia apesar di tanto baina y rumor riba su bida priva. Pa ta franco, bo lo no ta robes si bo bisa cu e Rey di Pavia Country Club tabata e otro gran ganador di e eleccion aki (aunke cu caya ta papia cu awendia e no ta dje fuerte ey mas…).

Raiz, cu den nan di dos ciclo electoral a logra cultiva suficiente confianza pa yega na dos asiento, pero na final di dia kico di berdad ba gana si ja caba den e prome simannan di participacion den e gabinete nobo b’a dobla riba dos di bo cabaynan di campaña mas grandi, esta refineria y e hotel St. Regis…Naturalmente tabatin perdedornan mas obvio den e elecccion aki. RED, cu durante campaña a cay den e rabbit-hole di antivaxx, a pasa definitivamente pa olvido. Accion21 di baina a logra drenta parlamento, pero no por kita e smaak amargo di perde diferente candidatonan high profile manera Daphne Lejuez y Cristian Soto na caminda, lagando fundador y lider Miguel Mansur practicamente como Lone Ranger riba escenario. Ongeveer mescos tambe ta conta pa MAS, cu practicamente for di comienso tabata un vehiculo di un asiento pa Marisol Lopez-Tromp pero a bira un cabey boto pa su number dos, Aquanette Gunn cu a logra gana e stoelendans den e partido ey for di Solangel Laclé. Sinembargo e vehiculo ey no a yega mas leu cu un puesto den oposicion pa e ex-minister, hunto cu Accion21 y AVP, cu pa di dos ciclo concecutivo a come sla den eleccion cu un lista den cual kier a schuif solamente dos candidato nobo dilanti, manteniendo e chubatonan bieuw den top y Benny Sevinger, sospechoso den caso Avestruz, den posicion pa saka su mes aunke cu e tabata sera den KIA. Lider Mike Eman no por a haya manera pa renoba su partido, aunke cu awo si porfin tin bista riba un posibel sucesor p’e den e persona di Gerlien Croes, cu apesar di tin e resting b*tch face mas potente riba nos isla practicamente tabata un di e poconan cu a bay dilanti cua voto den henter e eleccion aki.

Unabes cu a logra sinta despues di un proceso di formacion absurdamente largo pa dos partido cu practicamente tabata famia caba, e barco cu yama Gabinete Wever-Croes Part Deux a sigui nabega den olanan pisa. Hulanda, Covid, sindicatonan bou guia di oposicion, pero tambe nan mesun cabesura y tin biaha ineptitud no a yuda tampoco. Politica na Aruba a para bira un comedia, cu peleanan entre yiu di Tanchi y casa di Gerlientje, acusacion di persona ilegal trahando na cas di mama di hende y naturalmente e tantisimo apuntacionnan dubioso di hendenan yega pa puestonan halto y otro privilegionan. Y como ultimo palo cu a cay, a pone WEB seal the deal cu Eagle LNG riba lomba di ingenieronan, directiva y hasta hefe di hunta di e productor di awa. E lomba cu a actually dobla tabata esun di partido Raiz, cu a perde su credibilidad ora nan a gruña nan partner den coalicion despues di a wordo trata manera mucha ora nan a cuestiona e deal, pero na final a keda sin morde. Eynan a mustra un biaha mas con cruel politica na Aruba por ta. Un dia bo ta carga e speranza di votadornan hoben y progresivo pa un politico nobo. E dia despues bo maskara ta cay y bo ta mustra di ta exactamente ‘mescos cu nan’…

Mester bisa tambe cu tur esaki a cu un prensa mey mey den tur e bululu aki cu tabata comprometi na un of otro banda of cu no tabatin tin e modo pa controla poder debidamente. Y mirando desaroyonan manera e menasa atrobe cu lo kier regula prensa al estilo di Cuba y con titulonan manera Amigoe, e gran dama y ultimo exponente di prensa liber di berdad, ta cabando na nada, e miedo grandi tey cu e di cuarto poder definitivamente ta na peliger na Aruba.

Unda e barco lo pega na baranca no ta conoci, pero 2022 ta mustra di bay bira un aña devastador economicamente. Cu tur confiansa den gobernantenan y institucionnan a bay perdi lo no yuda Aruba sali for di e crisis aki, sowieso no riba su propio forsa. Ady Thijsen semper a bisa cu politica ta cruel. E sigur mester sa, pasobra hopi biaha den su trayectoria politica tabata cruel cune. Pero e aña aki tin un silver lining pa Ady. A lo menos e por yena su maletanan, book su business class cu KLM y bandona e barco cu ta yenando cu awa. E si por canta: ‘Aña Nobo, Bida Nobo’…