Subiendo e ola

110 caso awe. Esaki ta e parti di e ride di e Slingshot na Orlando na unda despues di tanto suspenso e capsule a los y abo y esun band’i bo ta shoot bay ariba tur na grito. E problema ta cu awo bo a ripara cu e schroef di e bara di hero cu ta wantabo na bo sienta a los un tiki. Ta nos mes a buske den dianan di fiesta. Enjoy the ride!

Hopi discusion riba e paspoort di vacuna di Common Trust Network cu gobierno a firma p’e. Hopi hende ta contra, otronan by now ta convenci cu no tin otro manera. Ami mes personalmente ta somewhere mey mey den e discusion ey. Ami ta 100% pro-vacuna, pero loke ta preocupami mas tanto – fuera di con sigur di berdad bo datonan medico lo keda - ta e consecuencianan a largo plazo y con commercial third parties lo actua cu hende nan data y mas ainda, e posibel inevitabilidad di un gap financiero y social riba tur nivel entre esnan cu si a prik y esnan cu pa cualkier motibo no a prik (ainda), sea pa falta di placa, accesibilidad, alergia of hasta nan conviccion pa no tuma e vacuna. Un cos ta bay ta sigur, pa un tempo no tur di nos lo por move liber bay tur caminda, pero esey eigenlijk ja caba ta e caso y e vacuna (y e prueba cu bo a prik) ta bay juist duna grupo di hende parti di nan libertad bek. Pero aworaki tin diferente variabelnan cu lo keda desconoci te ora e cos lo ta canando caba. Un cos ta sigur, tur cos tin su prijs y nos no sa ainda precies kico tur esaki ta bay costa nos a largo plazo. Pero te awo mi ta hopi willing pa paga y mi ta gradecido pa ta den e posicion pa por hacie. Yega numa cu e prik ey.

Tin hopi opinion, hopi puntamento di dede, hende asumiendo boshi cos. Contagio ta start na hotel? Hende ta bisa cu si. Mi a puntra Tanchi y e kiermen cu e data ta bisa cu no. Hopi hende cu ta kere cu nan por haci calculo pero ta miss the point completamente pa loke ta e impacto di Covid. Pa nan djis un di e tantisimo casonan di bida real: Mucha ta yega cas for di scol cu e malesa, pega henter famia, incluyendo welo cu wela. Wela ta muri y na e entiero tin hende cu ainda ta malo canando rond pasobra ja, ta entiero. Mas hende ta pega cu Covid eynan, incluyendo ancianonan cu na dado momento ta bira asina malo cu un di nan tambe ta bira un di e 50 mortonan cu e malesa aki ta cobra. Y asina facil por yega cu un hende den apenas un paar di siman por perde mama y wela na e virus. Hende no ta echt papia over di con e por pasa, y masha tiki ta wordo papia over di contagio cu ta start na scolnan, pero den asina un frega di wowo e por bay. Y asina nos ta subi e di tres ola aki, perdiendo bista pa tera pa un rato atrobe.