press to zoom

press to zoom
1/2
  • Ariën Rasmijn

Tiger di papel


Pa esnan cu kizas no ta compronde: henter e idea di tin un Ombudsman ta pa tin un entidad cu berdaderamente ta para riba politica. Esnan cu ta acudi serka dje mester ta 100 porciento sigur di esey y cu e lo por defende nan te na final, maske con grave e consecuencia por ta pa e entidad gubernamental of persona contra ken e keho a wordo entrega. Pa por haci esey, Ombudsman mester wordo protehi for di e esfera politico. Pues su presupuesto mester ta separa, su nombracion mester tuma luga pafo di politica y - anto esaki ta di crucial importancia - e no por wordo kita sin mas dor di gobierno ma mando. Pa por garantisa esaki ta esencial cu e puesto di Ombudsman ta ancra den staatsregeling di Aruba, haciendo cu pa por kite lo mester tin sosten di no menos cu 2/3 parti di parlamento. Mi ta kere cu e concepto aki ta uno cu hasta e parlamentario di coalicion mas manso y inepto por compronde. Toch?


Imaginabo si e amienda lo a wordo tuma. Djis pensa riba e consecuencianan cu esaki lo tin pa e fibra social di Aruba. Pa prome biaha den historia di nos isla, cualkier ciudadano cu lo experiencia algun inhusticia of trato robes for di un instancia gubernamental, un ambtenaar of te hasta un director of mandatario, lo tabatin un caminda pa cana independientemente, sin mester conta riba un ayudo extraordinario for di paden, sin mester chupa serka un politico, sin mester considera laga para pasobra esnan cu a haci malo ta amigo of famia of na un otro manera conecta cu poder y pa via di esey ta untouchable. E ciudadano humilde, sin faam of coneccion pisa lo por tabatin chens di haya husticia porfin, riba su propio meritonan danki na un Ombudsman cu lo tabatin tur e autonomia pa por investiga y sanciona cada ken cu faya, sin mester tene cuenta cu represaya of perde su trabou pasobra ela touch hende cu no mag di touch. Mi por compronde pakico a lo menos e partido mas grandi den coalicion a vota contra e amienda cu lo ancra Ombudsman den staatsregeling. E status quo den cual e clase politico y e top di ambtenarij ta e entidad cu tin tur regla na nan fabor y cu nunca ta perde ta algo cu nan - y cu ‘nan' mi ta referi na e dos partidonan tradiconal - a traha generacionnan largo pa establece y mantene. Nan posicion den comunidad ta minimalmente mesun fuerte cu esun di cierto famianan. Nan ta y semper lo keda para riba e resto di pueblo. Nan ta e casino, y manera nos tur sa di casino: The house always wins. Esey ta e esencia di Cauchi Baulo y nan - sea cu nan ta berde of geel - ta te den nan higra inverti den e politica bieuw aki. Y ni maske con hoben algun di nan ta, nan lo cay muri cu e mentalidad ey tambe. Henter nan ecosistema ta hala e rosea putri di patronahe, nepotismo y e mentalidad chikito di purba mantene control y poder atraves di perversion di e sistema. Anto riba dje nan, nan media y nan siguidornan kier yama esaki cultura. Cu e mesun lens aki nan ta mira tur cos, for di e casonan penal contra Paul Croes y Benny Sevinger te cu permisologia. "Asina Aruba ta. Esey ta nos sistema.” Pero e unico berdad ta cu ainda nan kier keda mantene nan posicion di bentaha cueste loque cueste. “Asina e sistema Arubiano ta.” Ponebo corda con ni 50 aña pasa Rubianonan tabata considera racismo, alcoholismo, batimento di pareha, incest y abuso sexual di menor parti di nos cultura tambe. Pues nada nobo akinan. Hasta e argumento cu nan kier uza ta uno fofo, manera cu nan no kier ni haci nan best. Nan kiermen cu na otro paisnan den Reino en Ombudsman no ta protehi den staatsregeling, pues pakico na Aruba si? Un hende a puntra con efectivo e Ombudsman ta na Corsow? Loke ta un desapunto a lo menos mesun grandi cu e hecho cu den pleno 2022 gobernantenan no por tin ni e decencia moral pa haci lo corecto y garantisa e funcionamento optimal di un Protector di Pueblo ta e hecho cu un partido cu a haya voto a base di e promesa cu nan lo ta diferente a comete e mesun perversion di nos estado di derecho cu e MEP bieuw cu a perde tur tipo di gevoel tanto decada pasa caba. Mi por imagina cu lo tuma hopi mas cu un boter di Listerine pa kita e smaak amargo cu esaki lo mester a laga serka e electorado di Raiz. Cu tanto doblamento, e partido aki ta haciendo hopi daño, no djis na nan mesun wes’i lomba pero tambe na e idea di partidonan nobo den politica Arubiano. Hende drechi cu lo kier purba mayan lo mester subi un sero hopi mas halto pa por haya confiansa di swing voters. Awo, no comprondemi malo. Ami no ta bou ningun ilusion cu si partidonan den oposicion - incluyendo esnan cu mas a vocifera pa e amienda - lo tabata na otro banda di e sala, nan si lo a haci drechi y vota pa e 2/3 parti. Hecho ta e lo no a cumbini nan tampoco y mi por bisa esaki cu confiansa pasobra ya for di 2005, off and on, nan mes tabatin e chens y e poder pa introduci un Ombudsman drechi y completo. Pero ata nos aki, 17 aña despues cu un Ombudsman na caminda berdad, pero sin proteccion. Un tiger di papel cu lo haya su mes mal sirbi na e momento cu e mishi cu interes of ego di un ’niet zomaar iemand’. Ta un berguensa pa wak con moralmente bancarota nos politica ta keto bay. Y loke mas ta duel mi ta cu hasta hende cu obviamente mester sa miho ta keto of ta sostene con un sistema ta wordo manteni den cual un clase di hende semper lo keda desampara mientras cu e otro semper lo keda protehi djis pasobra e ta afilia na e color di turno of tin e faam corecto. Pasobra si Ombudsman bati na su porta, e por wordo manda cas, mane ta nada.


0 opmerkingen
Ad SETAR Complete 60+.gif