1/2
  • Ariën Rasmijn

Tin vacuna pa covid, pero no pa miedo

E palabranan cu a morde Ady bek na su chanchan aña pasa ta keda vigente; Politica ta CRUEL. Siman pasa mi a haya informashon di un poll cu a wordo haci cu un biaha mas ta ratifica cu pueblo di Aruba ta sumamente dividi pa loke ta e vacuna. E cantidad di hende cu ta dispuesto pa tuma y esnan cu pa cualkier motibo no kier ta practicamente riba un 50/50. Esey riba su mes lo ta OK si e caso no tabata cu pa e vacuna traha y nos haya herd immunity, 85 porciento di henter nos poblacion mester tuma e prik. Si no, tanto bal vacuna. Tin hopi desinformacion, miedo y desconfiansa. Hopi hende kier wak prome ken tur ta bay vacuna y si ta bay tin side effects. Otronan ainda ta kere den tur tipo di conspiracy theories y cu somehow e vacuna ta bay haci nan catibo di Bill Gates y Big Pharma, of cu solamente e tipo di spiritualidad y ‘high vibrational’ lifestyle cu nan yoga instructor a bende nan ta e respuesta. Aki aya tin hende cu hopi followers cu from day one ta para grita cu Covid ta djis un griep y cu nos mester sacrifica nos bida y economia djis pa protehe hende bieuw y obeso. Hopi tempo pasa mi mama a siñami: ‘a bobaso no se hace caso’, pero di bes en cuando mi no por yuda di bay den discusion cu e hendenan aki, por ta te hasta troll nan un tiki.

Awo e discusion a bira pakico si of pakico no tuma e vacuna. Lagami cuminsa mustra riba e hecho cu na hopi otro pais tin mucho tiki vacuna y e pleito ta riba ken si y ken no ta haye prome. Pero akinan te awo ta mustra cu e mayoria necesario ta bay wordo tur dia cubri, anto pornada. Dus nos ta asina malcria cu nos por afford di tin e discusion ridiculo aki di tume of no. Pa por compronde pakico ta importante pa mas hende posibel vacuna, bo mester sa ki rol precies e vacuna eigenlijk ta hunga den henter e wega aki. E motibo pakico e virus ta peligroso aworaki ta pasobra e ta nobo y nos immune system no sa con pa handle e pasobra e no sa con pa traha antibodies p'e. Anto e antibodies nan ey bo ta haya door di bira malo of door di tuma un vacuna. Con cu bay bin, na dado momento e virus ta bay bira endemico. Esey kiermeen cu nunca e lo disparse, pero cu a lo largo cu mas hende haya nan antibodies, creando herd immunity, menos e ta bay circula y menos efecto e ta bay tin riba hende nan salud. Loke e vacuna ta haci ta accelera e proceso di pone e virus bira endemico. Pa por yega eynan, mas hende posibel - no djis esnan high risk y di edad, pero tambe hobennan, hende cu no ta high risk y hasta hende cu a haya e virus caba - tin cu prik pa crea of boost nan antibodies. E idea ta pa yega na un mayoria absoluto (aki na Aruba e ta 85% di e populacion) pa kita e virus lo mas posibel for di circulation. E mayoria absoluto aki - probablemente y lamentablemente - lo mester wordo refresca cada aña atrobe cu un otro vaccinatieronde, mescos cu e griepprik. Pues con cu bay bin e vacuna ta bay bira endemico. E pregunta ta si ta nos bay tuma e caminda largo y costoso di hacie via laga hende bira malo of pa vacuna y accelera e proceso ey drasticamente y na un costo economico, social y emocional hopi menos halto. Mester scucha y compronde tur e preocupacionnan, tuma esnan cu ta bon argumenta na serio y mester intercambia, splica y conscientisa unda cu por. Y esnan den top mester ta consistente den nan mensahe y ehempel. Bo por ta minister di Salubridad, haci tanto bo best y bisa cu bo ta cla pa tuma e vacuna, pero si cada rato bo ta laga saka bo portret para pega banda di hende anto sin bisti bo masker…E ora ey bo no a lesa e memo full bon y ni abo, ni prome minister por enforsa autoridad moral ora bo partner den coalishon bay den direccion contrario. Y net e liderazgo ey mester, awor cu e discusion di tuma vacuna si of no aparentemente ta coriendo riesgo di bira uno politico. Bo lo kere cu den e mesun coalishon na unda ta purba di tur forma pa busca un manera pa convence un pueblo dividi cu - a base di sciencia y hechos, no riba gevoel of desinformacion - e vacuna tey pa yuda protehe nos cuido, salbaguardia nos economia y saca nos for di e crisis aki, tur partido lo tin nan nanishi punta den mesun direccion. Pero no. Ricardo Croes, lider di RED, ta keda post tur tipo di disparate infunda bou di e pretexto cu mester respeta su derecho y di otronan pa bisa no na e vacuna. Ami nunca a spera cu e topico di vacuna awo a bay para bira un question politico, cu - mescos cu e politisacion di uzo di masker a causa cantidad di morto na Merca - por haci nos pais tremendo daño, no solamente pa cu nos cuido pero tambe pa nos economia. Anto akinan ta unda mi kier bay bek na e palabranan famoso di Ady. Wak con cruel politica por ta. Pasobra loke sigur mi no ta spera ta cu lider di RED, un homber cu semper mi a considera di ta un persona inteligente y cu caracter fuerte, a sabiendas cu nos pueblo ta letterlijk 50/50 dividi riba e topico aki, ta politisando esaki pa gana voto na september…Nunca lo mi a pensa cu cualkier politico por ta asina cinico tampoco... Loke un hende tin cu sinta y splica Ricardo y tur esnan cu ta haya cu ta nan derecho pa dicidi si of no, ta cu berdad na ta liber pa haci uzo di e derecho ey y cu niun hende lo ever nenga nan esey. Nos ta y semper lo keda un pais liber. E hecho riba su mes cu bo por dicidi y defende bo decision pa no tuma e vacuna ta muestra di esey caba. Pero di otro banda nan no por nenga di nan banda tampoco e repercusionnan cu e decision ey lo tin pa nos tur. Esey ta conta dobbel ora bo ta politico, ni maske con bo ta sclama cu bo no ta un. Como politico bo ta wordo midi cu un otro meetlat y bo compromiso na interes general mester ta impecabel. Esey kiermen cu como parlamentario, Ricardo Croes mester para pa interes general prome y hopi, HOPI despues pa su propio interes/miedo/paranoia of con cu e kier yame. Y e interes general, cu tur prueba su tras ta pa un mayoria absoluto di 85 porciento di poblacion tuma e vacuna pa asina nos tur por sali for di e crisis. Door di no ta solidario, Ricardo Croes y esnan cu kier sigui su ehempel lo a sacea nan preocupacion - cu te awo by all accounts ta mustra di ta infunda - y lo sinti nan mes masha great pa un rato. Y francamente, si nan ta bay ta e 15 porciento cu no kier, tambe ta bon. Laga nan ta e redundancy numa. Basta cu nos yega na e 85 porciento di cobertura di vacunacion pa haya herd inmunity. Pero si nos no yega na e percentahe ey, e ora mi ta spera cu lo bay buska cuenta serka cada un di nan pa tur esnan cu lo keda bira malo y fayece, y e hecho cu nos economia y nos turismo lo no por restart danki nan miedo y entitlement. Mi ta spera cu nan lo tuma e responsabilidad cu ta bin cu e derecho ey cu nan a uza, y cu nan lo tin nan contesta cla pa tur esnan cu nan lo a perhudica si e dia ey yega.

0 reacties
Ad SETAR Complete 60+.gif

ABONA NOS RIBA NEWSLETTER

  • Schwarz Facebook Icon
  • Schwarz Twitter Icon
  • Schwarz YouTube Icon