Un hilo fini

E yamado cu ta saliendo for di nos sector di cuido completo pa Hulanda stop e cortamento den gastonan ta uno legitimo, con cu bo mire. Ta increibel con den un pandemia ta bay corta net den e sector cu mas mester di sosten structural. Introduci eigen bijdrage, cambia condicionnan pa e seguro, adapta e lista di remedi, pero no bay corta den tal forma cu mas hende lo actually keda sin wordo yuda adecuadamente. Si, nos a scohe pa cuido universal y sure, tin vet pa corta. Pero na dado momento - hopi lihe pa ta franco - e corta ta daña hopi mas cu e ta cura. E yamado saliendo for di tur actor local, di gobierno pa enfermeronan y hospital ta uno cu mester wordo scucha y tuma na serio pa Hulanda. Esaki ta un di e poco cosnan aworaki den cual nos tur ta uni den e aña di eleccion aki. Anto keremi, si bo wak con e variantenan nobo di Covid ta raspando na Latino-America y Europa awo, nos ta bay tin mester di nos cuido mas cu nunca. E vacuna por ta no ta bay proteha completamente y esaki lo por kemen cu e pesadiya aki ta bay dura hopi, hopi mas largo. Pues si b’a cumpra ticket pa concierto, ami lo bisa pa bo wak pa bo haya bo cen bek pasobra ni kico nan ta bisabo e cos aki no ta bay door.

Esaki ta momento pa ta solidario cu otro. Pero un otro yamado tambe ta saliendo for di WEB, Elmar y Arubus. Trahadornan kier stop di entrega parti di nan salario. Nan obviamente no ta wak con serio e situacion ta, of por wel di ta tin un aspecto politico hungando un rol tambe, pero un parti di nan argumento ta indiscutibel: no tur empleado publico ta entregando, pues dicon nan si mester? Akinan no por lepia. Den un situacion asina, tur tin cu bay di acuerdo y tur mester entrega. Si tin apenas un cu si ta kebra cobra 100%, henter asunto ta choria tardi of trempan. Y pa con toondoof y egoista e trahadornan aki ta mustra di ta, e argumento ey so ta duna nan razon.

Anto cos ta mustra di bay bira hopi mas fastioso pa nos unico entrada, turismo. Hulanda a pone mas restriccion riba biahamento y esaki a resulta den decision di KLM pa para tur long haul flights. AAA y ATA ta bisa cu esaki te awo no ta mustra di tin consecuencia pa vuelonan pa Aruba. Te awo. Danki Dios TUI ta para duro ainda y a bisa cu por lo pronto nan ta keda bula pa akibanda. Te awo. Cos aki ta colgando na un hilo fini.