press to zoom

press to zoom

press to zoom
1/2
  • Ariën Rasmijn

Wariruri


Un real estate ad ofreciendo benta di henter area di Wariruri a pone basta hende kima nan chip recientemente. Aparentemente poco hende tabata na altura cu e pida costa aki di alrededor di 11.000 m2 ta tereno eigendom cu ta pertenece na un famia local. E prijs cu nan ta pidi ta e bunita suma di 5 miyon florin. Ami mes ta corda for di mi tempo na Amigoe (RIP) cu miembronan di e famia tabata kier a sera entrada pa e tereno (pues cu e lugar aki tin doño no ta nada nobo), pero cu esaki na final no por a tuma lugar.

Hecho ta cu den ROPV e tereno aki a wordo destina como area di Natuur en Landschap, cual ta practicamente igual na Natuurgebied, cu e diferencia - importante - cu proteccion di e area aki no ta cay bou di e Natuurbeschermingsverordening cu por ehempel si ta conta pa e areanan cu ta cay bou maneho di Fundacion Parke Nacional Aruba. Esey kiermen por ehempel cu den area di Wariruri, contrario na por ehempel Miralamar, Spaans Lagoen of Bubaliplas, hendenan si por bay campa eynan durante Semana Santa (cu nan vergunning obviamente). Pesey tambe pa tanto aña por a tene competencia di bodyboarding eynan. Pa ambos Natuur en Landschap y Natuurgebied ta conta cu no mag di construi. Minister di Infrastructura sinembargo por haci cambionan den ROPV pero esaki formalmente no mag bay mas leu cu acomoda pa construccion di un edificio chikito cu funcion di research y educashon. Minister di Infrastructura sinembargo por cambia destinacion di e area si e kier. Esey a tuma lugar na Seroe Colorado, cu consecuencia cu awor ta construyendo Secrets eynan y tin kavelnan pa otro hotel y tambe vivienda den e area di Bachelor Beach.

Anto akinan e storia aki ta bira interesante. Den e ad, e real estate agent (anto esey mi ta touch un djis) ta bisa cu e tereno ta atractivo pasobra e lo ta un oportunidad excelente pa un projecto di resort. Mirando e destinacion actual di e tereno, bo lo puntra bo mes si acaso tin un intencion conoci caba di parti di gobierno pa pull un Benny y cambia destinacion. Mirando cu ta trata di e mesun persona cu gobierno a core for di Algemene Rekenkamer pa un coi loco, bo lo duda cu e real estate agent cu ta handle e listing aki tin e tipo di acceso y goodwill aki serca oficina di minister di Infrastructura, pero na Aruba tur cos ta posibel awendia. Pero tambe sin un cambio di bestemming lo por ta posibel pa construi na un lugar manera Wariruri. Segun mi a compronde anto. Aparentemente e mesun loophole cu ta haci cu hende por campa eynan por facilita pa un operador pone un pop-up resort temporario na Wariruri. Tipo di actividadnan aki na sitionan remoto y unico manera den desierto of North Pole ta sumamente popular y - ban ta honesto - sin duda lo ta un diversificacion pa Aruba su turismo y si esaki ta e intencion, mi ta bet bo cu esnan cu a firma permiso pa por opera algo asina lo uza esaki como argumento. Riba dje no ta asina tampoco cu Wariruri ta completamente aisla. ATV, UTV, tour di cabay ta pasa eynan tambe regularmente. Pues no ta strañami at all cu ta ofreciendo Wariruri na benta pa un suma cu un local nunca lo por afford.

Y mirando con nos - y akinan mi kiermen nos tur - a bende y ta bendiendo tereno y casnan cu lo por a bay na un famia local hoben (y cu local mi kiermen tur esnan cu ta biba na Aruba, sea ta Croes of De La Cruz of Kruizinga) na prijsnan ridiculo e lo no sorprendemi si otro pidanan di tereno den naturalesa cu ta eigendom lo ta next. No confundi si, mi problema no ta si e doñonan nobo lo ta stranhero. Pami tur hende cu di berdad ta stima nos isla ta welcome y Aruba su populacion ta asina bunitamente mezcla caba cu esey no mester ta algo pa discuti mes, pa no papia mes riba con nos maneho di estranheria ta uno atraza y racista. Mi problema ta cu hendenan cu no tin binding cu Aruba (distincion importante) ta haya chens pa adkiri propiedad pa inversion of pa pasa un paar di luna, causando prijsnan impagabel pa localnan. Y den e caso aki mas ainda mi problema ta cu un desesparacion pa pone mas peso caba riba nos naturalesa cu a pasa su carrying capacity pa loke ta turismo hopi aña pasa caba. Pues ta bale la pena pa tene un wowo skerpi riba posibel benta di e area di Wariruri, pasobra cu yegada di un resort di cualkier tipo na costa panort lo bin otro golpi mas pa nos recurso mas importante, nos naturalesa.



0 opmerkingen
Ad SETAR Complete 60+.gif